रियल जुसमा फेरी भेटियो कीरा

शनिश्चरे २८ भाद्र काठमाडौँ र आसपासका जिल्लामा कीरा र अखाद्य पदार्थ भेटिएको घटना सेलाउन नपाउँदै झापाको शनिश्चरेमा रियल जुसमा कीरा भेटिएको छ । शनिश्चिरे बजारको अधिकारी किराना पसलबाट किनेको रियल जुसमा गड्यौलाजस्तो लामो कीरा र लेदा फेला परेको हो । दमक १८ बाह्रघरे घर भई अर्जुनधारामा पाहुना आएकी पाँच वर्षीया अपेक्षा खतिवडाले खाँदै गरेको जुसमा सो कीरा फेला परेको प्रत्यक्षदर्शी स्थानीय चन्द्र रानाले बताए । उनले भने, ‘बालिकाले जुस तान्न सकिनन्, खोलेर हेर्दा भित्र लेदो र कीरा भेटियो ।’

अखाद्य पदार्थ भेटिएको जुसको बट्टामा डेट अफ एक्स्पाएर लेखिएको छैन भने व्याच नम्बर एनबी ००१३ डी उल्लेख छ । दुईसय एमएल परिमाणको सो बट्टामा ०६÷१० उत्पादन मिति मात्र उल्लेख छ । एक साताअघि विर्तामोडको थापा इन्टरप्राइजेजबाट सो जुस खरिद गरेर ल्याइएको किराना पसलका संञ्चालक सोम अधिकारीले बताए । उनका अनुसार जुसमा कीरा र लेदो भेटिएपछि बाँकी जुस विक्री नगरी राखिएको छ ।

इन्टरप्राइजेजले माइपूर्व झापा र पहाडी जिल्लामा रियल जुसको बिक्री गर्छ। इन्टरप्राइजेजका कर्मचारी खगेन्द्र उप्रेतीका अनुसार रियाल जुसमा कमिलाले प्वाल पारेको खण्डमा त्यस्तो हुनसक्ने बताए । यस क्षेत्रमा इन्टरप्राइजेजले मासिक पौने दुईलाख मुल्यको रियल जुस बिक्री गर्ने भए पनि कर्मचारी उप्रेतीले दुई हजार पिस अर्थात सवालाख रुपैयाँ मुल्य बराबरको कारोबार हुँदै आएको बताए । झापामा मात्र साढे तीनलाख रुपैया बराबरको मासिक कारोवार हुने कम्पनीले जनाएको छ ।

केही महिनाअघि विर्तामोडको पश्चिम बस स्टेण्ड रहेको किराना पसलमा फु्रटीमा कीरा भेटिएको थियो र त्यो समाचार मेचीनगर अनलाईनमा प्रथम पटक प्रकाशित समेत भएको थियो । यसरी खाद्य पदार्थमा छ्याप्छ्याप्ती अखाद्य पदार्थ भेटिनु र सम्बन्धित निकायले ध्यान नदिँदा उपभोक्ताहरुको स्वास्थ्यमा प्रतिकुल असर पर्नुका साथै उपभोक्ता हितको खिल्ली उडिरहेको छ ।