पचास रुपैयाँले लियो नाबालकको ज्यान

भद्रपुर, आश्विन १४ - झापामा एक नाबालकले अर्का एक नाबालकको साथमा रहेको पचास रुपैयाँ खोस्ने लालचमा भाटाले प्रहार गरी हत्या गरेको छ । झापाको पथरीस्थित विद्यालयमा कक्षा ६ मा अध्ययनरत १२ वर्षीय चन्द्रलाल हास्दाले सोही विद्यालयमा कक्षा २ मा अध्ययनरत १२ वर्षीय नवीन सुब्बाको टाउकोमा भाटाले प्रहार गरेपछि उनको घटनास्थलमा मृत्युभएको जिल्ला प्रहरी कार्यालयले जनाएको छ ।

हत्याको अभियोगमा चन्द्रलाललाई प्रहरीले पक्राउ गरेको छ । गत मङ्गलबार विद्यालयमा मध्याहृनको खाजा खाने बेलामा चन्द्रलालले छात्र सुब्बाको साथमा ५० रुपैयाँ देखेपछि त्यो रुपैयाँ लिनका लागि उनलाई फकाएर विद्यालयबाट ९०० मिटर टाढा लगेर धानको खेतमा भाटाले प्रहार गरेका थिए ।

भाटाको प्रहारबाट सुब्बा लडेपछि उनलाई त्यहीँ छोडेर पूर्ववत् रुपमा उनी आफ्नो कक्षामा आएर बसेका थिए । उक्त घटनाको सम्बन्धमा चन्द्रलालले कसैलाई नबताएको र मृतक सुब्बा घर नफर्केपछि उनको खोजबिन भएको थियो । विद्यालयमा अभिभावकद्वारा बुधबार विद्यालयमा खोजबिन गर्दा अर्का एक छात्रले चन्द्रलालको साथमा रहेको बताएपछि ऊसँग केरकार गर्दा उक्त घटनाको रहस्य खुलेको थियो ।

त्यसपछि धानको खेतबाट बुधबार साँझ शव ल्याई पोस्टमार्टमका लागि भद्रपुरस्थित मेची अञ्चल अस्पतालमा लगिएको छ । रासस