भारतबाट दसैंका लागि फर्कने नेपालीहरुको ओइरो

१६ असोज, दमक । नेपालको विभिन्न जिल्लाबाट रोजगारीका लागि भारतको विभिन्न ठाउँ गएका नेपाली चाडपर्व मान्नलाई घर र्फकन थालेका छन् । मेचीनगर अनलाईनका प्रतिनीधि प्रकाश पौडेल नेपाल भारत सीमाना काकँडभिट्टा पुग्दा भारतवाट चाडवाड मान्न घर फकर्ने ओइरो लागेको भेटेका थिए ।  

भारतको कोइलाखात, दिल्ली, हरियानालगायतका ठाउँमा काम गर्न गएकाहरू नेपालको पूर्वी नाका झापाको काँकडभिट्टा बाटो भएर घर र्फकन थालेका हुन् ।

मेचीनगर अनलाईनसँगको कुराकानीमा  गुल्मी घर भएका श्यामकुमार दर्जीले आफू तीन वर्षपछि दसैँ मान्न घर फर्किएको बताउनुभयो । काँकडभिट्टा आफन्तको घरमा आइपुग्नु भएका दर्जीले आफूले काम गर्ने कम्पनीमा तीन सयभन्दा बढी नेपाली रहेकोमा एक सय जनाको बिदा मिलेकाले आफू आएको बताउनुभयो ।

दसैँको मुखमा गाडी नपाइने र तिहारमा अरू साथीलाई बिदा मिलाउनका लागि दसैँलगत्तै र्फकन छिटो घर आएको दर्जी बताउनुहुन्छ ।

अध्यागमन कार्यालय काँकडभिट्टाका अनुसार भारतका विभिन्न ठाउँमा काम गर्न गएका नेपालीहरू र्फकने क्रम दैनिक रूपमा बढिरहेको छ ।

सबैले दर्ता गराएर तथा कार्यालयमा सम्पर्क गरेर नेपाल नछिर्ने गरेकाले यसको तथ्याङ्क भने कार्यालयसँग छैन । नेपाल र भारतको खुला सीमानाका कारण एकिन तथ्यांक भने पाउन गाह्रो छ । कुनै पनि नेपालीले भारतमा यात्रा गर्न राहादानीको आवश्यकता पर्दैन त्यस्तै कुनै पनि भारतीयहरु नेपालमा विना इजाजत भ्रमण गर्न सक्दछन् ।

दैनिक रूपमा पचासदेखि एक सयसम्म नेपाली चाडपर्व मान्न नेपाल र्फकने गरेको बताइएको छ ।

विशेषगरी विपन्न समुदायका युवा रोजगारीको सिलसिलामा कोइलाखानीलगायतमा जोखिमयुक्त काम गर्न भारतको उडिसा, हरियाना, दिल्ली, पञ्जाब जाने गरेका छन् ।