लिविया अलपत्र वनाइएका परिवारमा दसैं खल्लो

पर्वत पोर्तेल, काँकडभिट्टा, आश्विन ३० - अफ्रिकन मुलुक लिविया अलपत्र वनाइएका झापालीका परिवारले आफन्तलाई तत्काल उद्धार गरी स्वदेश फर्काउन सरकारसँग माग गरेका छन् ।

त्यहा अलपत्र घैलाडुवा झापाका राजेश भुर्तेलकी पत्नी अन्जनालगायतले त्यस्तो आग्रह गरेका हुन् । अन्जनाले भन्नुभयो, 'जसरी हुन्छ सरकारले अलपत्रलाई उद्धार गरेर सकुसल स्वदेश फर्काउन पहल गर्नुपर्छ ।' सुरुंगा ४ कि उर्मिला खड्काले पनि आफ्ना पतिको सकुशल उद्धार गर्न सरकारसंग

माग गरेकी छन् । लिवियामा आफन्त अलपत्र वनेका परिवारको यो वर्षको दशै पनि खल्लो बनेको छ । खड्का भन्छिन्, 'उहाँ हुँदा निक्कै रमाइलो हुन्थ्यो, यहा नै नहुदा नरमाइलो लागि रहेको छ ।'

उनका पति ढकालवहादुर विगत केही महिनादेखि लिवियामा अलपत्र वनेका छन् । भुर्तेलसहित गोल्धापका श्रवण शिवाकोटी, विजय राई, डिल्ली सिटौला, वुद्धकुमार लिम्वु, उमाकान्त खतिवडा, सुर्यवहादुर लिम्वु, देवराज मेचे, लीलावहादुर श्रेष्ठ, श्यामबहादुर खड्कालगायतका दर्जन वढी झापालीसहित दुई दर्जन जति लिवियामा अलपत्र छन् ।

गत चैतमा विर्तामोडको एड्भान्चर मेनपावरमार्फत उनीहरु लिविया गएका थिए । तर, कम्पनीले सम्झौता अनुरुप तलव नदिएपछि नेपालीले आन्दोलन गरेका थिए । आन्दोलन गरेकै कारण उनीहरुलाई खान पनि नदिई राखिएको पीडितले जनाएका छन् ।

News Source : Kantipur