बेचिएकी चेलीलाई खुट्टा भाँचेर फर्काइयो

@

सुब्रत न्यौपाने, झापा

झापा, २३ असार

कुबेतमा बेचिएकी झापाकी चेलीलाई दुवै खुट्टा भाँचेर नेपाल फर्काइएको छ । जेनर नाम गरेकी घरमालिक्नीले चरम कुटपिट गर्दा खुट्टा भाँचिएकी राजगढ-६ की हिमा गिरीलाई एक महिनासम्म मानसिक अस्पतालमा राखेर घर फर्काइएको हो । शारीरिक तथा मानसिक यातना दिई जबर्जस्ती कुबेतकै अस्पतालमा भर्ना गरिएकी ३० वषर्ीया गिरी अशक्त अवस्थामै घर फर्केकी हुन् ।

झापाको सदरमुकाम चन्द्रगढीभन्दा झन्डै २० किलोमिटर टाढा पर्ने देहातकी यी महिलाको दुवै खुट्टामा स्टिल लगाइएको छ । हिँडडुल गर्न नसकेपछि उनी एक महिनादेखि आफ्नै घरमा थलिएर बसेकी छन् । स्टिल लगाइएको ठाउँको घाउ पाकेर पिप बग्न थाले पनि आर्थिक अभावका कारण उनले उपचार गर्न सकेकी छैनन् । उपचारखर्च जुटाउन नसक्दा उनको घाउ जटिल बन्दै गएको शक्ति समूहकी पूर्वाञ्चल संयोजक भद्रकला पाठकले बताइन् ।

'उपचार गर्न जाऊँ पैसा छैन,' मलीन स्वरमा गिरीले भनिन्, 'कतैबाट सहयोग भइदिए उपचार मात्रै गर्न पाए पनि हुन्थ्यो ।' आर्थिक रूपले विपन्न गिरी परिवारलाई बिहान-बेलुकाको छाक टार्न पनि समस्या छ । उनका श्रीमान् राजन गिरी मजदुरी गर्छन् । उनका तीन नाबालक छोरा छन् । एक कठ्ठा ऐलानी जग्गामा बस्दै आएको गिरी परिवार अहिले खाए भरे के खाऔँ भन्ने अवस्थामा छ ।

भारतीय बाटो हुँदै कुबेत पुर्‍याइएकी गिरीले राम्रोसँग खानसमेत नपाएको बताइन् । 'एउटा रोटीका भरमा बिहानदेखि बेलुकासम्म काम गर्नुपथ्र्यो,' उनले भनिन्, 'खानसमेत नदिई मालिक्नीले कुट्थिन ।' रोजगारीको प्रलोभनमा पारेर गिरीलाई स्थानीय दिवस राईले भारतीय बाटो हुँदै कुबेतमा लगेर बेचेका थिए । राई हाल झापामै छन् । गिरी परिवार उनीविरुद्ध उजुरी गर्न सक्ने हैसियतमा छैन ।

भारतको दिल्लीमा आफू पहिलोपटक बेचिएको उनले बताइन् । राईले ९ मंसिरमा पूर्वीनाका काँकडभिट्टा हुँदै उनलाई भारतको दिल्ली पुर्‍याएका थिए । उनलाई त्यहाँ १५ दिनसम्म राखिएको थियो । उनीसँगै बेचिएका अन्य १५ महिलाको भने अत्तोपत्तो छैन । राई आफैँले गिरीको पासपोर्ट बनाइदिएका हुन् ।

घरमालिक्नीले ठेलेर लडाइदिँदा दुवै खुट्टा भाँचिएको उनले बताइन् । बालबच्चा राम्रोसँग नहेरेको भन्दै घरमालिक्नीले धकेल्दा उनी लडेकी थिइन् । बच्चा लड्न लागेको देखेर मालिक्नीले आफूलाई धकेलेको उनले बताइन् । घरमालिक्नीले दैनिकजसो दिने यातनाका कारण उनले भाग्ने प्रयास गरे पनि सफल भएन ।

त्यहाँ बालबालिकाको हेरबिचारदेखि लिएर घर सफा गर्ने र खाना बनाउनेसम्मका काम गर्नुपरेको उनले बताइन् । 'एकछिन पनि राम्रोसँग सुत्न दिँदैनथे,' उनले भनिन्, 'कुटेर यहीँ मार्लान् भन्ने पीर थियो, तर बाँचेर आएँ ।' खुट्टा भाँचिएपछि उनलाई नासर नाम गरेका घरमालिकले अस्पताल भर्ना गरेका थिए । त्यहाँ दुई महिनासम्म उनको उपचार गरिएको थियो । 'उपचार हुँदाहुँदै पागलखाना पुर्‍याए,' उनले भनिन्, 'घाउ दुखेको पीडा सहन नसकेर म अत्यन्तै रोएँ ।' आफू धेरै रोएपछि बौलाई भन्दै पागलखाना लगिएको उनले बताइन् । उनलाई त्यहाँ एक महिनासम्म राखिएको थियो ।

'मलाई केही भएकै थिएन,' उनले भनिन्, 'तर अस्पतालको जस्तो गाली त्यहाँ खानुपरेन ।' पागलखानाबाट निकालेपछि घरमालिकले आफूलाई नेपाल फर्काएको उनले बताइन् । हिँड्ने वेलामा 'रोइकराई गरेर माग्दा मालिकले बल्ल नेपाली तीन हजार रुपैयाँ दिएको उनले बताइन् । नेपाल फर्किएपछि उनलाई बेच्ने दलाल राईले कुबेतमा खुट्टाको उपचार गर्दा लागेको पैसा फिर्ता मागेर झन् मानसिक यातना दिइरहेका छन् । 'मालिकले मसँग पैसा लिनू भनेको छ रे !' उनले भनिन्, 'आफ्नो यो गति छ, कहाँबाट पैसा ल्याएर दिनु ।' दलाल राईले उपचार गर्दा लागेको भन्दै २५ हजार रुपैयाँ मागिरहेका छन् ।