बाढीले झापामा यसपटक २७ परिवार विस्थापित

गत वर्षको बाढीबाट दुई अर्बबराबरको क्षति बेहोरेको झापामा यसपटक पनि बाढीको विनाश शृंखला सुरु भएको छ　। असारको अन्तिम सातासम्म पाँच बालबालिकासहित सातले ज्यान गुमाएका छन्　। साउनको प्रारम्भमा तीन गाविसका २७ घर परिवार विस्थापित हुनुका साथै दुई सय २७ घरमा आंशिक क्षति पुगेको छ　।

रतुवा र बिरिङखोलामा सोमबार आएको बाढीले ती घरपरिवार विस्थापित भएका हुन्　। जिल्लाको पश्चिमी गाविस लखनपुरबाट पाँच, शरणामतिबाट नौ र डाँगीबारीबाट १३ घरपरिवार विस्थापित भएको नेपाल रेडक्रस सोसाइटी झापाले जनाएको छ　। रेडक्रसले गाउँ-गाउँका उपशाखामार्फत बाढीको क्षति विवरण संकलन गरेको हो　।

विस्थापित परिवारलाई स्थानीय विद्यालय र सार्वजनिक भवनमा बस्ने व्यवस्था मिलाइएको रेडक्रस सोसाइटी झापाका अध्यक्ष लोकराज ढकालले बताए　। 'चार दिनयताको वषर्ाले झापाका दुई दर्जन गाविसमा बाढीको जोखिम बढेको छ,' अध्यक्ष ढकालले भने, 'जोखिम कम गर्न खोला आसपासका कतिपय घर भत्काउन थालिएको छ　।'

विस्थापितलाई रेडक्रसले त्रिपाल, कम्बल र केही खाद्यसामग्री बाँडेको छ　।

विस्थापित अधिकांश विपन्न समुदायका छन्　। दैनिक ज्यालादारीमा काम गरेर गुजारा चलाउनेलाई समस्या भएको रेडक्रस सोसाइटी उपशाखा घैलाडुब्बाका सभापति चन्द्र चुडाल बताउँछन्　। बिरिङको बाढीले डाँगीबारी गाविसमा तीन सय बिघाभन्दा बढी खेतीयोग्य जमिन बगाएको छ　।

'घरमा बिरिङको बाढी पसेपछि रातारात भाग्यौँ,' विस्थापित भएकी डाँगीबारी-२ की मीना राजवंशीले भनिन्, 'धन्न, ज्यान जोगियो　।' पूर्व-पश्चिम राजमार्गदेखि साढे तीन किलोमिटर दक्षणिमा रहेको घैलाडुब्बाको पशुबजारनजिकका पाँच सय परिवार बाढीको जोखिममा छन्　। जोखिम क्षेत्रका कतिपय बासिन्दाले घर छाडिसकेको रेडक्रस उपशाखा सभापति चुडालले जानकारी दिए　।

बाढीको उच्चजोखिम रहेका झापाका सात मुख्य खोलामध्ये बिरिङ प्रमुख मानिन्छ　। बिरिङ, कन्काई, रतुवा, मेची, निन्दा, हँडिया र टाङटिङलगायतका खोलाले बर्सेनि विनाश गर्दै आएका छन्　। खोला गाउँ पस्नबाट रोक्ने भरपर्दो उपाय नभएकाले स्थानीयवासी रातभरि जाग्राम बस्ने गरेका छन्　। सयौँ गाउँलेलाई बेघरबार बनाउनेगरी बर्सेनि आउने बाढी नियन्त्रण गर्न सरकारीस्तरबाट प्रभावकारी पहल नभएकाले गाउँले थप सास्ती बेहोर्न बाध्य छन्　।

यसपटक चार लाख खर्च गरेर घैलाडुब्बा गाविसले बनाएको बाँध भत्किसकेको छ　। अघिल्लो वर्ष बाढीप्रभावित बनेको झापाको ६ लाखभन्दा बढी जनसंख्या यसपटक पनि उस्तै जोखिममा छन्　। जिल्ला प्रशासन कार्यालय झापाका अनुसार जिल्लाका आधा दर्जनभन्दा बढी खोलामा बाढीको जोखिम उच्च छ