दुई जिल्ला बन्द, प्रजिअलाई थाहा छैन
मेचीनगर अनलाइन
|
Monday, August 2, 2010
|
0 comments
झापा/ सहकर्मी चालकका परिवारलाई क्षतिपूर्ति उपलब्ध नगराएको विरोधमा यातायात मजदूरले बन्दलाई फराकिलो बनाउँदै लगेका छन् । शनिवार मेचीमा मात्र आहृवान गरिएको बन्द आइतवारदेखि कोशीमा पनि विस्तार भएको छ ।बन्दका कारण दुई दिनदेखि पूर्वमा सार्वजनिक सवारीका साधन सञ्चालन भएका छैनन् । मजदूर संघ-संगठनले बन्दलाई थप सशक्त बनाउने निर्णय गरेपछि आइतवारदेखि कोशीमा पनि यातायात सेवा अवरुद्ध भएको छ ।
स्थानीय प्रशासनले भने बन्द खुलाउने दायित्व आफ्नो नभएको जनाएको छ । 'बन्द जसले गरेको हो खुलाउने जिम्मा पनि उसैको हो', झापाका प्रमुख जिल्ला अधिकारी यादवराज कोइरालाले भने, 'कसले किन बन्द गरेको मलाई पनि थाहा छैन । '
दुई वर्षअघि मोरङको भाउन्नेमा घाँटी रेटेर हत्या गरिएका झापा गरामनीका ट्याक्सी चालक दीपक पाण्डे र जन्तीको कुटाईबाट मारिएका बस चालक शेरबहादुर बस्नेतको परिवारले राहत नपाएको विरोधमा यातायात मजदूर आन्दोलनमा उत्रिएका हुन् । दुवै घटनामा स्थानीय प्रशासन गम्भीर नभएको जनाउँदै अखिल नेपाल यातायात मजदूर सङ्घ, नेपाल यातायात स्वतन्त्र मजदूर सङ्गठन र नेपाल यातायात मजदूर सङ्घले बन्दको आहृवान गरेका थिए ।
पाण्डेको २१ चैत २०६५ मा मगरको २६ फागुन २०६६ मा हत्या भएको थियो । पाण्डेको हत्यापछि पीडित परिवारलाई तीन लाख ५० हजार रुपैयाँ राहत र नाबालक छोरालाई निःशुल्क पढाइदिने सहमति भएको थियो । झापाको घैलाडुब्बाबाट जन्ती लिएर मोरङको गोविन्दपुर जाँदै गरेको मे. १ ख १८३५ नम्बरको बसका चालक मगरलाई जन्तीले कुटेर मारेका थिए । बसको हुटमा चढेका जन्तीलाई ओराल्न खोज्दा झापाको सुरुङ्गामा उनीमाथि आक्रमण भएको थियो ।
'मजदूर प्रतिनिधि नबोलाई कसरी वार्ता सफल हुन्छ ?', मजदुर संघका अध्यक्ष लक्ष्मण बस्नेतले भने ।
Filed Under: समाचार
0 comments
Trackback URL | Comments RSS Feed