कहालीलाग्दो आत्महत्याको श्रृंखला

धरैजसोले विष सेवन गरेर र झुण्डिएर आत्महत्या गरेको तथ्यांकले देखाएको छ । जिल्ला प्रहरी कार्यालयका प्रहरी नायव उपरीक्षक वसन्त थापाका अनुसार विष सेवन गरेर, झुण्डिएर, आगो लगाएर, औजार प्रयोग गरेर, हाम फालेर, करेन्ट लगाएर आत्महत्याका घटना हुने गरेका छन् ।
आर्थिक र पारिवारिक समस्या नै आत्महत्याको मुख्य कारण भएको नायव उपरीक्षक थापा बताउँछन् । प्रेममा असफलता, दीर्घरोग, मानसिक रोग, वेरोजगारी र गर्मी पनि आत्महत्याको कारण भएको उनले बताए ।
तथ्यांक अनुसार वृद्धवृद्धादेखि किशोर किशोरीहरुसम्म आत्महत्या गर्नेको सूचीमा परेका छन् । आत्महत्याका घटनालाई न्यूनीकरणका लागि सरकारले विशेष योजना ल्याउनुपर्ने उनले बताए ।
समाजमा यस्ता घटनालाई कम गर्न मनोचिकित्सकद्वारा चेतनामूलक कार्यक्रम गर्न सके प्रभावकारी हुने थापा सुझाव छ ।
झापा र इलाममा नेपालको सबभन्दा बढी आत्महत्या हुने गरेको छ । गत वर्षसम्म इलाममा बढी आत्महत्या हुने गरेकोमा अब झापाले यो रेकर्ड उछिनेको छ ।
मेची अञ्चल अस्पतालका डा. बालकृष्ण साहले सर्ट टेम्पर्डका कारण महिलाहरुले आत्महत्या गरेको पाइएको बताए । ओरगानो फोरेस, फोरेट, थाइडिन जस्ता विषादी सेवन गरी आत्महत्या गर्नेको संख्या बढी भएको डा. साह बताउँछन् ।
झापाको छिमेकी जिल्ला इलाममा भने तुलनात्मकरुपमा आत्महत्याको संख्या घट्दै गएको छ । मेची अञ्चल प्रहरी कार्यालय भद्रपुरका अनुसार चालु आर्थिक वर्षमा इलाममा १९ पुरुष र १३ महिला गरी ३२ जनाले आत्महत्या गरेका छन् । यसैगरी पाँचथर जिल्लामा ४ पुरुष र ५ महिला गरी ९ जनाले आत्महत्या गरेका छन् । ताप्लेजुङमा ५ पुरुष र ३ महिला गरी ८ जनाले आत्महत्या गरेका छन् ।
तराईमा भएको अत्यधिक गर्मीका कारण पहाडको तुलनामा आत्महत्याका घटना बढेको मेची क्याम्पसका प्रमुख चिन्तामणि दाहाल बताउँछन् । अत्यधिक गर्मीका कारण होस ठीकमा नरहँदा विवेक गुमाएर आत्महत्या हुने गरेको दाहालको भनाई छ ।
यसैगरी पठनपाठनमा कमजोर, प्रेममा असफल हुनु पनि आत्महत्याको अन्य कारण भएको दाहाल बताउँछन् 
युवायुवतीहरुले आत्महत्या गर्नुको कारण वेरोजगारी समस्या भएको प्रमुख दाहालले बताए । काम नपाउँदा उनीहरुमा नैराश्यता बढेर आत्महत्या गरेको बताउने दाहाल यसलाई कम गर्न जनचेतनामूलक कर्याक्रम गर्नुपर्ने बताउँछन् ।

Filed Under: समाचार