‘प्रस्तावित लिम्बुवान’ क्षेत्रमा नयाँ मुद्दाबाट आन्दोलन सुरु
मेचीनगर अनलाइन
|
Thursday, August 19, 2010
|
0 comments
‘सर्वजातीय सरकार’ मागमा पूर्वका ९ जिल्ला ठप्प, पाँचथरमा एक लिम्बुवान कार्यकर्ता पक्राउ
खिलानाथ ढकाल
खिलानाथ ढकाल
विराटनगर, भदौ २ ÷ राजकुमार नाल्बो अध्यक्ष रहेको संघीय लोकतान्त्रिक राष्ट्रिय पार्टीले ‘सर्वजातीय सरकार’को नयाँ मुद्दा अघि सार्दै सो माग सुनिश्चित गराउन सरकारलाई दबाब दिन बुधबार पूर्वका नौं जिल्ला ठप्प पारेको छ । लिम्बुवानको बन्दले ९ वटै जिल्लामा यातायात बन्द रह्यो, बजार र उद्योगधन्दा खुलेनन् । धेरै जिल्लामा शैक्षिक संस्था पनि ठप्प रहे । ‘सर्वजातीय सरकार’सँगै नयाँ संविधान पनि सर्वजातीय हुनुपर्ने र यसका लागि राजनीतिक गोलमेच सम्मेलन गर्नुपर्ने, सहमतीय राष्ट्रिय सरकार र राजनीतिक गतिरोध फुकाउन दबाब दिन बन्द आह्वान गरिएको पार्टी अध्यक्ष नाल्बोले बताए । दमकमा आयोजित पत्रकार सम्मेलनमा उनले लिम्बुवान आन्दोलनलाई सशक्त पार्न आफूले नयाँ मुद्दा सारेको बताए । मोर्चाले लिम्बुवानवादी संगठनसँग विगतमा गरिएका सहमति कार्यान्वयन गर्न समेत सरकारसँग माग गरेको छ ।
लिम्बुवानको बन्दले मोरङ, झापा, सुनरी, धनकुटा, तेह्रथुम, संखुवासभा, इलाम, पाँचथर र ताप्लेजुङको जनजीवन प्रभावित भयो । जिल्लास्थित संवाददाताका अनुसार बन्दको असर मेची अञ्चलमा बढी परेको छ । ती जिल्लामा शैक्षिक संस्था पनि ठप्प छन् । विराटनगरमा बन्दको असर खासै परेन । पाट्टफुट्ट सवारीसाधन चले । शिक्षण संस्था पनि सञ्चालन भए । धनकुटामा यातायात बन्द रहे पनि शिक्षण संस्था र बजार खुला रहेको छ ।
बन्दमा बजार र यातायात बन्द गराउँदै हिँडेका एक कार्यकर्तालाई पाँचथर प्रहरीले बिहान पक्राउ गरेको छ । पक्राउ पर्नेमा नोगेन थेवे रहेका छन् । उनलाई जिल्ला प्रहरी कार्यालय पाँचथरको टोलीले बजार बन्द गराउँदै गर्दा पक्राउ गरेको हो ।
कुमार लिङदेन अध्यक्ष रहेको संघीय लोकतान्त्रिक राष्ट्रिय मञ्चबाट संविधानसभामा प्रतिनिधित्व गरेकोमा भर्खरै अलग भएर नाल्बोले नयाँ पार्टी खोलेका हुन् । मञ्च संविधानसभा चुनावमा माओवादीबाट विद्रोह गरेका लक्ष्मण थारु र पूर्वका ९ जिल्लालाई आत्मनिर्णयको अधिकारसहित स्वायत्त लिम्बुवान प्रदेशको माग गर्दै संघर्षरत कुमार लिङ्देनका दुई छुट्टै पार्टीले बनाएको चुनावी मोर्चा थियो । मञ्चबाट समानुपातिकतर्पm थारु प्रतिनिधि रुक्मिणी चौधरी र लिङ्देन प्रतिनिधि राजकुमार नाल्बो सभासद् थिए ।
नाल्बो लिङ्देन समूहमा हुँदा यसअघि आत्मनिर्णयको अधिकारसहित पूर्वका ९ जिल्लालाई लिम्बुवान स्वायत्त राज्य घोषणा गर्नुपर्ने मागमा आन्दोलन गर्दै आएका थिए । पार्टी विभाजनपछि उनले त्यसमाथि नयाँ मुद्दा थपेर आन्दोलन थालेका हुन् ।
एकै मोर्चामा रहेर पूर्वका नौं जिल्लालाई ‘प्रस्तावित लिम्बुवान राज्य’ घोषणा गरेर आन्दोलन गर्दै आएका लिम्बुवानवादी संगठनमा फुटमाथि फुट छ । संविधानसभामा कुमार लिङ्देन पक्षबाट सभासद् बनेर गएका नाल्बोले लिङ्देनकै राजनीतिक विचारसँग विमति राख्दै छुट्टिएर नयाँ पार्टी खोलेका हुन् ।
Filed Under: समाचार
0 comments
Trackback URL | Comments RSS Feed