लालसरीको नयाँ घर

विर्तामोड, ११ भदौ । कोरिया अन्तर्राष्ट्रिय विकास नियोग (कोइका)–को सहयोगमा आफ्नो घर बनेपछि मेचीनगर–६ बस्ने लालसरी चौधरी खुशी बनेकी छन् ।

‘खरको छानो भएको घर थियो, पानी पर्दा चुहिन्थ्यो’ कोइकाले विहीबार आयोजना गरेको घर हस्तान्तरण समारोहमा चौधरीले भनिन्, ‘अब त ढुक्क भयो ।’ उनले टीनको छानो र पक्की वालको चिटिक्क परेको घर निर्माण गरेकी छन् । भन्छिन्, ‘यो घर बनाउन एक लाख २० हजार रुपैयाँ लाग्यो ।

लालसरीको मात्र होइन, इलाम, झापा र मोरङमा कोइकाको सहयोगमा बनेका घरमा उनको घर ५००औं हो । नेपालमा कोइकाकी आवासीय प्रतिनिधि योङ्ग अह डु भन्छिन्, ‘थप ८१ घर बन्दैछन् ।’ उनले नेपालका विभिन्न क्षेत्रमा कोइकाले सहयोग गर्दै आएको जानकारी दिंदै थपिन्, ‘शिक्षा र स्वास्थ्यका क्षेत्रमा भोलेन्टियरको माग भए उपलब्ध गराउन सक्छौं ।’

कोइका लगायतका दातृ निकायको सहयोगमा ह्यावीट्याट फर ह्यूमानीटी नेपालले मुलुकका १४ जिल्लामा सात हजार घर बनाइसकेको कार्यक्रममा जानकारी दिइयो । ह्यावीट्याटले दातृ निकायको सहयोग र स्थानीय संघसंस्थाको सहकार्यमा  विपन्न एवम् पछाडि पारिएको समुदायलाई घर बनाउनका लागि सहुलियतमा ऋण उपलब्ध गराउने गरेको छ । ती संस्थासँग सहकार्य गर्दै झापाको सामुहिक हातेमालो विकास समूहले एक हजार दुई सय ९४ घर निर्माण गरिसकेको संस्थाका अध्यक्ष पंकजविक्रम नेम्वाङले जानकारी दिए । 

लालसरीको घर कोइकाको ५००औं, ह्यावीट्याटको ७०००औं र हातेमालोको १२९४औं घर हो ।