बासमतीको बोरामा जीरा मन्सुली चामल

 खिलानाथ ढकाल झापा, भदौ ७ / जिल्ला प्रशासन कार्यालय मोरङले विराटनगरमा सञ्चालित खाद्यान्न उद्योगहरुमा गरेको अनुगमनमा अधिकांश उद्योगले बजारमा पठाएका चामलका प्याकेटमा कम तौल भेटिएको छ । प्रशासनसहित चार निकाय सम्मिलित बजार अनुगमन समितिले एक सातादेखि विराटनगर र आसपासका क्षेत्रमा अनुगमन गरेको थियो । 

१४ खाद्य उद्योगको गरिएको अनुगमनमा अधिकांश उद्योगले बजारमा पठाएका चामलका बोरा तथा प्याकेटहरुमा तोकिएको भन्दा कम परिमाण भेटिएको अनुगमन समितिका सदस्य उत्तम ढुंगेलले बताए । ‘अनुगमनमा चामल उद्योगहरुले व्यापक ठगी गरेको पाइयो’, ढुंगेलले मेचीनगर अनलाईसँग बताएका छन् । 

आइतबार टंकिसिनवरी–१ मा रहेको मनकामना सेलर मिलको अनुगमनमा मिलले उत्पादन गरेको बासमती चामलको प्याकेटभित्र अर्कै चामल फेला परेको छ । मनकामना सेलर मिलले बासमती भनेर बजारमा पठाएको प्याकेटहरुमा जीरा मन्सुली जातको चामल भेटिएको हो ।

वाणिज्य कार्यालय बिराटनगर, जिल्ला प्रशासन कार्यालय, नापतौल तथा गुण नियन्त्रण कार्यालय पब्लिक फोरमसमितिले बासमती चामल लेखिएको बोरामा अन्य जातका चामल हालेर बिक्री गर्ने मनकामना सेलर मिलमा बिक्रीको तयारी अवस्थामा राखिएको १ सय ३६ बोरा चामल बिक्री नगर्न चेतावनी दिएको छ । ‘जीरा मन्सुलीकै प्याकेटमा राखेर बिक्री नगरे कारबाही गरिने छ’, उनले भने ।