झापाका घरेलु उद्योगमा ५ अर्बभन्दा बढीको लगानी

घरेलु तथा साना उद्योग कार्यालय भद्रपुरमा दर्ता भएका ५ हजार ४ सय ७१ वटा फर्ममा ५ अरब भन्दा बढी पूँजी  लगानी       भएको छ ।

घरेलु कार्यालयमा अघिल्लो आर्थिक बर्षसम्ममा ३ हजार १ सय ५७ वटा उद्योग दर्ता भएका थिए भने १ हजार ४ सय १ वटा वाणिज्य फर्म दर्ता भएका थिए । यसैगरी गएको आर्थिक बर्षमा ३ सय ३१ वटा नयाँ उद्योग दर्ता भएका छन् भने ५ सय ५२ वटा वाणिज्य फर्म दर्ता भएका छन् । गएको आर्थिक बर्षमा दर्ता भएका उद्योगको कूल पूँजी ३१ करोड ४६ लाख ९७ हजार देखिएको छ । वाणिज्यको कारोबार गर्नेले ५० लाख सम्मको स्थिरपूँजी भएको फर्म घरेलुमा दर्ता गर्न पाउँछन् । यसैगरी डेढ करोडसम्म स्थिरपूँजी भएको उद्योग घरेलुमा दर्ता हुन्छ । ५० लाख भन्दा बढीको वाणिज्य फर्म वाणिज्य विभागमा र डेढ करोड भन्दा बढीको स्थिरपूँजी भएको उद्योग, उद्योग विभागमा दर्ता गर्नुपर्ने प्रावधान  छ । घरेलु कार्यालयमा करोडौं लगानी गरेर सञ्चालित उद्योग दर्ता छन् । तर, कर धेरै लाग्ने डरले अधिकांश उद्योगले थोरैपूँजी देखाउने गरेका छन् । इटाभट्टा, चियाखेती, ठेक्कापट्टा, फर्निचर, क्रसर उद्योग पनि घरेलुमा दर्ता हुने गरेका छन् । एउटै उद्योगले करोडौं पूँजी लगानी गरेका छन्् । तर कागजी रुपमा थोरै मात्र देखाउने गरिएको घरेलु प्रमुख कृष्णप्रसाद भण्डारीले बताउनु भयो ।

झापामा गतबर्ष भएको तथ्यांकलाई आधार मानेर हेर्ने हो भने प्राइभेट फर्म सञ्चालनकले आयकर र भ्याट लगायतका कर छल्ल थोरै पुजी देखाउने गरेका हुन् । झापामा गत आर्थिक बर्षमा दर्ता भएका ३ सय ६१ वटा उद्योगबाट ७ लाख ४६ हजार ८ सय राजश्व असुली भएको छ भने वाणिज्य  फर्म दर्ताबाट ९ लाख  ९७ हजार ३ सय ८७ रुपैयाँ असुली भएको घरेलु कार्यालयका नायव सुब्बा रुद्र कार्कीले जानकारी दिनु भयो । गएको आर्थिक बर्षमा तालिम केन्द्र लगायतका १ सय ८६ वटा सेवामुलक उद्योग दर्ता भएका थिए । यसैगरी १ सय ७३ वटा उत्पादनमुलक उद्योग दर्ता भएका थिए । उर्जा, खनिजमा भने एउटा पनि उद्योग दर्ता भएनन् । पर्यटन, उर्जा, कृषि तथा वन्यजन्तुमा एक÷एक  वटा उद्योग मात्र दर्ता भएका छन् । घरेलु कार्यालयमा बर्षेनी करोडौं पूँजी भएका उद्योग दर्ता भएपनि ती उद्योग चले–नचलेको विषयमा घरेलु कार्यालयले कुनै चासो राख्ने गरेको  छैन ।