विद्युत महशुल तिर्नलाई सास्ती

दूधे, १९ भदौ / मध्य झापाका ५ वटा गाविसका झण्डै १२ हजार विद्युतका ग्राहकले न्यूनतम महसूल बुझाउन तेब्बर रुपैयाँ खर्चिनु परेको छ । 

झापाका शिवगञ्ज, धरमपुर, सतासीधामका उपभोक्ताले लागतको तेब्बर रुपैयाँ खर्चिनु परेको हो । यस्तै, महाभारा, पाँचगाछीका आधा बढी विद्युतका उपभोक्ताले विद्युतको न्यूनतम ८० रुपैयाँ बुझाउन २४० रुपैयाँ खर्चिनु परेको स्थानीय उपभोक्ताले बताएका छन् । 

दक्षिणी महाभारा र पाँचगाछी गाविसका आधा बढी उपभोक्ताले दुधे हुँदै दमक गएर महसूल बुझाउने गरेका छन् । महाभाराबाट दूधेसम्मको ४० रुपैयाँ, दुधेबाट दमकसम्मको २५ र दमकबाट विद्युत प्राधिकरणसम्मको रिक्साभाडा २० गरी कूल ८५ रुपैयाँ एकोहोरो यातायात खर्च लाग्ने महाभारा–७ का उपभोक्ता

विद्युत महसूल बुझाउन लाग्ने तेब्बर खर्च १२ हजार उपभोक्ताले बर्षौदेखि खर्चिदै आएका छन् । सतासीधाम र धरमपुर गाविस उपभोक्तालाई दोब्बर खर्च लाग्ने भए पनि महाभारा, शिवगञ्ज र पाँचगाछीका लागि तेब्बर खर्च हुने गरेको नेपाली कांग्रेस सतासीधामका सभापति पर्शुराम ढुंगानाले बताए । 

प्राधिकरण स्रोतका अनुसार यतिका संख्यामा उपभोक्ता हुनु भनेको शाखा कार्यालय स्थापनाका लागि मापदण्ड पुगेको हो । झापाको सतासीधाममा दशक अघि निर्माण भएको विद्युत प्राधिकरणको २ कोठे पक्की भवन प्रयोगविहीन छ । पूर्वाधार सम्पन्न सो भवनमा महसूल काउण्टर स्थापना गरे तेब्बर रुपैयाँ खर्चिने ग्राहकलाई राहत मिल्ने थियो ।

कांग्रेस सभापति ढुंगानाका अनुसार झिलझिलेमा विद्युतसंगै टेलिफोन महसूल काउण्टरको आवश्यकता खड्किएको छ । झण्डै ८ सय हाराहारीमा सतासीधाम शिवगञ्ज र धरमपुरमा तार जडित फोनका ग्राहक छन् । भरपर्दो शान्ति सुरक्षा खानेपानी लगायतका पूर्वाधार भएर पनि मध्य झापाका विद्युत तथा टेलिफोनका ग्राहकले पैसाको बर्वादीसंगै समय पनि खेर फाल्नु परेको उपभोक्ताको भनाई छ ।