नागरिकता पाउनलाई चर्पी अनिवार्य
मेचीनगर अनलाइन
|
Sunday, September 5, 2010
|
0 comments
विराटनगर, २१ भदौ सुन्दा अचम्म लाग्न सक्छ- ६ हजार जनसंख्याका लागि शौचालयमा मात्र साढे पन्ध्र लाख खर्च भएको छ । मोरङ तेतरिया गाविसमा गत आर्थिक वर्षमा गाविस, जिविसलगायत विभिन्न संघ-संस्थाले गरेको सहयोग गरी सो रकम खर्च भएको हो ।
सन् २०१५ सम्ममा जिल्लालाई नै खुला दिसामुक्त क्षेत्र घोषणा गर्ने सरकारी कार्यक्रमअनुरूप हरेक गाविसका वडालाई खुला दिसामुक्त क्षेत्र घोषणा गर्ने अभियान नै थालिएको छ । तेतरिया गाविसको जम्मा बजेट १० लाखमा ३० प्रतिशत बजेट शौचालयका लागि मात्र छुट्टयाइएको हो । 'गाउँवासी विकास निर्माणका लागि आएको बजेटसमेत चर्पी र सरसफाइमा लगाउन राजी भएका छन्,' गाविससचिव लीलाराम बाँस्तोलाले भने । सचिव बाँस्तोलाका
अनुसार गाविसलाई खुला दिसामुक्त घोषणा गर्न गत आर्थिक वर्षमा मात्र विभिन्न संस्थाले करिब साढे पन्ध्र लाख खर्च गरेका थिए । जसमा जिल्ला विकास समितिले एक लाख, नेपाल पिछडा वर्ग महासंघले एक लाख ५० हजार, पानीका लागि नेवाः नामक संस्थाले १० लाख, गाउँ विकास समितिले तीन लाख र जिल्ला खानेपानी कार्यालयले दुई सय ३७ बोरा सिमेन्ट सहयोग गरेका थिए ।'आगामी बजेटमा तीन लाख ५० हजार छुट्टयाउन गाउँ परिषद्मा प्रस्ताव गरिनेछ,' गाविससचिव बाँस्तोलाले भने, 'आर्थिक वर्ष २०६७/६८ मा पूरै गाविसलाई नै खुला दिसामुक्त क्षेत्र घोषणा गर्ने लक्ष्य लिएका छौँ ।' लक्ष्य पूरा गर्न गाविसभरि चेतनामूलक कार्यक्रम तथा नियम लागू गरिएको छ ।
गाउँका बासिन्दाले नागरिकता लिनका लागि घरमा चर्पी बनाउनैपर्ने नियम बनाइएको छ । नागरिकता लिन चर्पी भए/नभएको सिफारिस आवश्यक पर्ने प्रावधान राखिएको छ । 'जन्म, विवाह, मृत्यु दर्तालगायत सिफारिस गर्नुपरेमा पहिले चर्पी भए/नभएको बुझेर चर्पी हुनेको मात्र काम हुन्छ,' गाविससचिव बाँस्तोलाले भने, 'चर्पी नहुनेलाई केही दिनको समय दिइन्छ र बनाएको जानकारी पाएपछि उनीहरूको सिफारिस हुन्छ ।' गत वर्षको गाउँ परिषद्ले पारित गरेको सरसफाइसम्बन्धी घोषणापत्रमा कर्मचारी तथा राजनीतिक दलका स्थानीय नेता तथा कार्यकर्ताको घरमा अनिवार्य चर्पी हुनुपर्ने उल्लेख गरिएको छ ।
त्यसैगरी, जुन विद्यार्थीको घरमा चर्पी छ उसलाई स्वास्थ्य विषयमा १० नम्बर थपिदिने गरेको तेतरिया-४ स्थित विद्यामन्दिर निमाविका शिक्षक प्रह्लाद भगतले बताए । 'तर, जसको घरमा चर्पी छैन, उसको १० नम्बर घटाइन्छ,' शिक्षक भगतले भने । यो नियम गाविसभरि नै लागू गरिएको उनले जानकारी दिए ।
सरसफाइसम्बन्धी जानकारी भएपछि हालसम्म दुई वडा खुला दिसामुक्त क्षेत्र घोषणा गरिएको छ । त्यसमा २ र ३ वडा पूरै खुला दिसामुक्त घोषणा भइसकेको छ भने ७ र ८ वडाका केही टोल घोषणा भएका छन् र केही हुन बाँकी छन् । त्यस्तै, आगामी असोजमा ४ र ५ वडा र आर्थिक वर्षभित्रमा पूरै गाउँ नै खुला दिसामुक्त क्षेत्र घोषणा गर्ने लक्ष्य राखेका छन् ।
गत वर्ष २ प्रतिशत चर्पीको प्रयोग भएको भए पनि यस वर्ष ४८ प्रतिशत पुगेको उपस्वास्थ्य चौकी तेतरियाका अहेब मनोज मण्डलले जानकारी दिए । ग्रामीण इलाकामा विभिन्न गैरसरकारी संघ-संस्था तथा सरकारी निकायबाट खुला दिसामुक्त क्षेत्र घोषणा तथा सरसफाइसम्बन्धी काम हुँदै आएकाले चर्पी प्रयोग गर्ने बढेको उनको भनाइ छ । 'स्थानीयवासी चर्पीप्रति आकषिर्त भएका कारण विभिन्न सरुवा रोगको प्रकोपसमेत घटेर गएको छ,' मण्डलले भने ।
Filed Under: फिचर
0 comments
Trackback URL | Comments RSS Feed