हडताल गर्दा ८९ नेपाली कामदार कतारबाट निष्कासित

दोहा (कतार), आश्विन ७ - कतार सरकारको नियमविपरीत हडतालमा उत्रिएका ८९ जना नेपाली कामदार कतारबाट फिर्ता हुनुपरेको छ ।

तलब नबढाएको भन्दै दोहास्थित एक निर्माण कम्पनीमा आन्दोलनरत नेपाली कामदारलाई पक्राउ गरी स्वदेश फिर्ता पठाएको हो । १० दिन अगाडि पक्राउ परेका उनीमध्ये मंगलबार र बुधबार स्वदेश पठाएको हो । कम्पनीको नियमअनुसार तलब नबढाएको भन्दै उनीहरूले काम बन्द गरेर हडतालमा उत्रिएका थिए । कम्पनीले कामदारसँग प्रत्येक वर्ष १० प्रतिशत तलव वृद्धि गर्नुपर्ने नियम बनाएको थियो ।

'कम्पनीसँग प्रतिवर्ष १० प्रतिशत तलब बढाउने सहमति थियो । अघिल्लो वर्षसम्म त्यहीअनुरूप बढाए पनि यसपटक ९ महिनासम्म तलब नबढाएपछि हामीले काम बन्द गरेका हौं,' फर्केका दोलखाका जगतबहादुर कार्कीले भने ।

कम्पनीले दीपकबहादुर छेत्री अर्याल, नारायण सार्की र जगतबहादुरलाई कामदारलाई हडतालमा लगाएको भन्दै स्वदेश फिर्ता गर्ने योजना बनाएको थियो ।

२ वर्ष काम गरिसकेका कामदारलाई कम्पनीले आफैं घर फिर्ती टिकट दिएको थियो भने २ वर्षभन्दा कम अवधि काम गरेका कामदारलाई उनीहरूकै बक्यौता तलबबाट टिकट काटिएको नारायण सार्कीले बताए ।

News source : Kantipur Online