सासुले दिएको तनाव खप्न नसकेर आत्महत्या

चारआली, २० भदौ / अरुतिर तीजको रमझमले छोपिरहेको बेला धाइजन–६ कालीझोडामा भने सन्नाटा छाएको् छ । गाउँका कुनै पनि घरमा महिलाहरु चाडको खुशीले रमाउन सकिरहेका छैनन् ।

अत्यधिक मानसिक यातना र वेइज्जतिका कारण ३५ वर्षीया चन्द्रकला विश्वकर्माले शुक्रबार साँझ आत्महत्या गरेपछि दुःखी भएका गाउँले महिलाहरु तीजमा रमाउन नसकेका हुन् ।

सासु र ससुराले दिएको मानसिक यातना र चरित्रमाथि शंका गरेर सासुले प्रहरीमा उजुरी दिएपछि तनाव खप्न नसकेर चन्द्रकलाले आत्महत्या गरेको स्थानीयबासी बताउँछन् ।

चारआली प्रहरी चौकीका अनुसार सासु सीता तिरुवाले ससुरा जीतबहादुर तिरुवासँग अंगालोमा बाँधिएको आरोप लगाउँदै बुहारी चन्द्रकलाविरुद्ध जाहेरी दिएपछि शुक्रबार छलफलका लागि उनी चौकीमा आएकी थिइन् । 

चौकीबाट फकेर घर गई साँझपख उनले आत्महत्या गरेकी हुन् । साँझ ८ बजेतिर सिमेन्टीको पिलरको रडमा हरियो सलको पासो लगाएर आत्महत्या गरेको अवस्थामा उनलाई फेला पारिएको छिमेकी कमल लिम्बूले बताए ।

प्रहरी स्रोतका अनुसार उनको मृत्यु भएको अवस्थामा घरमा सासु सीता विश्वकर्मा र छोराछोरी मात्र थिए । मृतकका पति भीम तिरुवा भाडाको गाडी चलाउन बाहिर गएका थिए भने ससुरा जीतबहादुर तिरुवा गत मंगलबारदेखि नै फरार छन् ।

स्थानीयबासीहरु सासु, ससुरा र पतिले हेला गरेका कारण चन्द्रकलाले ६ महिना अघि पनि आत्महत्याको असफल प्रयास गरेको बताउँछन् । बेलैमा अस्पताल पुर्याइएकाले त्यसबेला उनी बाँचेकी थिइन् । पारिवारिक तनावकै कारण उनी ६ महिना माइत बसेर ८ दिनअघि मात्र घर फर्केकी थिइन् ।

गत मंगलबार सासुले ससुरासँग अंगालोमा बाँधिएको फेला पारेर थप्पड लगाएको भन्दै गाउँभरी हल्ला गरेपछि बुहारी चन्द्रकला पुरै निराश र विक्षिप्त बनेकी थिइन् । सासुले त्यही विवरणसहित प्रहरीमा जोहेरी दिएकी थिइन् । प्रहरीमा जाहेरी दिनुअघि नै ससुरा जीतबहादुर घरबाट फरार भएका थिए । हालसम्म उनी घर फर्किएका छैनन् ।

प्रहरीले घटनाको अनुसन्धान भइरहेको जनाउँदै मृतकको पोष्टमार्टम जाँच गरिसके पनि भिसेरा जाँचका लागि काठमाडौं पठाउने भएको छ ।

छिमेकी तेजबहादुर सुवेदीले अत्यधिक मानसिक तनाव झेलिरहेकी चन्द्रकलाको आत्महत्याको घटना पत्याउनै नसकिने बताए । ‘प्रहरीले घटनाको राम्रोसँग अनुसन्धान गरोस्’– सुवेदीले भने ।