एमाले कार्यकर्तामाथि आक्रमण

दुधे, २० भदौ / प्रधानाध्यापक नियुक्तिको विषयलाई लिएर उत्पन्न विवाद ३ महिला वित्दा पनि साम्य नभइरहेको अवस्थामा झापा धरमपुरको भानु माध्यमिक विद्यालयमा शनिबार एमालेले आफ्नो कार्यकर्तामाथि माओवादीबाट आक्रमण भएको जनाएको छ ।

विद्यालयका प्रधानाध्यापक भानु ढुंगानालाई पदमुक्त गरेर उनका समकक्षी तेजप्रसाद भट्टराईलाई प्रधानाध्यापकको नियुक्ति दिने निर्णय विद्यालय व्यवस्थापन समितिले गरे लगत्तै विद्यालय विवाद उत्पन्न भएको थियो ।

यसैबीच विद्यालयको उत्पन्न विषयलाई लिएर नेकपा एमाले धरमपुर गाउँ कमिटीका कार्यालय सचिव तारा सिग्देलमाथि शनिबार राति संघातिक आक्रमण भएको नेकपा एमाले धरमपुरले जनाएको हो । गाउँ कमिटीले एक प्रेस विज्ञप्ति जारी गरी सिग्देलमाथिको आक्रमण माओवादीले गराएको विज्ञप्तिमा उल्लेख छ । सिग्देलको लाइफलाइन अस्पताल दमकमा उपचार भएको थियो । घटनाका बारेमा नेकपा माओवादीले आधिकारिक रुपमा केही धारणा राखेको छैन ।

यता विद्यालय व्यवस्थापन समितिले शनिबार दिउँसो उत्पन्न विवादको निकासका लागि सर्वदलीय भेलाको आह्वान गरेको थियो । व्यवस्थान समिति र भेलामा सहभागी पार्टीै प्रतिनिधिबीच कुरा नमिलेपछि शनिबारदेखि विद्यालयमा अभिभावकले तालाबन्दी गरेका छन् ।