भन्सारमा संयुक्त गस्ती

पर्वत पोर्तेल का“कडभिट्टा– मेची भन्सारले डेढ सातादेखि सीमामा संयुक्त गस्ती शुरु गरेको छ । अवैध चोरी पैठारी नियन्त्रणका लागि खटाइएको सशस्त्र प्रहरीले जिम्मेवारी वहन गर्न नसकेको भन्दै भन्सारले संयुक्त गस्ती शुरु गरेको हो । 

तस्करको प्रलोभनमा परेर अवैध धन्दा नियन्त्रण गर्न नसकेको प्रहरीलाई आरोप छ । 

भन्सार अधिकृतको नेतृत्वमा करिव ५ जना र सशस्त्रका निरीक्षकको नेतृत्वमा त्यतिकै संख्यामा टोली परिचालन गरिएको हो । टोलीले अवैध सामान भित्र्याउने मुख्य नाकाहरु मेची पुल, वाहुनडागी नकलवन्दा र सतिघट्टा छोटी भन्सारलगायत आसपास क्षेत्रमा गस्ती गर्दैै आएको छ । 

यी अत्याधिक अवैध कारोवार हुने नाका मानिन्छन् । भन्सार अधिकृत उमेश वस्नेतले चोरी पैठारीमार्फत सामान भित्रन नदिन संयुक्त गस्ती परिचालन गरिएको जानकारी दिए । टोली प्रत्येक दिन विहान वेलुका र आइपरेको जुनै वेला पनि गस्तीमा खटिने गरेको छ । वस्नेतका अनुसार परिचालन भएयता टोलीले करिव ५ लाख मुल्य वरावरको अवैध सामान वरामद गरेको छ । टोली परिचालनपछि अवैध धन्दाका कारोवार केही मात्रमा निरुत्साहित भएको भन्सारको दावी छ । 

पहिले व्यापारीहरुको चहलपहलले सधै गुल्जार देखिने मेची भन्सार कार्यालय केही समययता सुनसान प्राय छ । दैनिक दर्जनौ व्यापारी कारोवारका लागि आउने पूर्वकै व्यस्तमध्येको एक मेची भन्सार अहिले सुस्ताएको देखिन्छ । भन्सार अधिकृत शिशिर घिमिरे भन्छन्,‘अवैध पैठारीको वढोत्तरीका कारण भन्सारको कारोवार सुस्ताएको हो ।’ घिमिरेका अनुसार व्यापारीहरु भन्सारको वाटो आउनै नचाहेपछि कारोवारमा असर पर्न गएको छ । 

भन्सार भर्खरैदेखि करिव ४० लाखको लागतमा निर्माण भएको सुख्खा वन्दरगाहमा सरेको छ । नया तथा भव्य  भवन छ ।  केही दिनपछि सवै सेवा सुविधा एकैथलोमा उपलव्ध गराउने भन्सारले जनाएको छ । तर, यत्रो संरचना तयार भएको करिव २ महिना वितिसक्दा पनि यसको संचालनका लागि लगाइने ठेक्का अझै लाग्न सकेको छैन । इन्टरमोडेल डेभलोपमेन्ट सर्भिसले दुई पटकसम्म वन्दरगाह ठेक्काका लागि टेण्डर आव्हान गर्दा पनि ठेक्का नलागेको हो । ठेक्का किन लागेन होला ? सवैलाई जिज्ञासा लाग्न सक्छ । यसको एकमात्रै कारण हो भन्सारमा पछिल्लो समय देखिएको कारोवार ।  भन्सारको दयनीय कारोवारकै कारण कसैले पनि ठेक्का लिने इच्छा नदेखाएपछि इन्टरमोडेलले स्वयम संचालन गर्ने भएको छ  । जसले ठेक्का पाउछ उसले १० वर्षका लागि १६ करोड रुपैया सरकारलाई दिनुपर्ने हुन्छ । भन्सारको कारोवार हेर्दा त्यो सम्भव हुन नसक्ने देखेर अन्यले ठेक्का लिन नचाहेको बुझिएको छ  । भन्सार श्रोतका अनुसार  कारोवार यही गतिमा जारी रहने हो भने केही समयपछि वन्दरगाहको मर्मत सम्हारमा पनि समस्या पैदा हुने छ । 

केही  समयदेखि सुनसान भन्सार कारोवारका कारण यो वर्ष पनि लक्ष्य अनुसार राजश्व संकलन हुने सम्भावना देखिदैन । चालु आर्थिक वर्षको भदौ २६ गतेसम्म भन्सारले लक्ष्य अनुरुप राजश्व जम्मा गर्न सकेको देखिदैन् । उसले भन्सार महसुल तर्फ ७ करोड १० लाख ९५ हजार, मुल्य अभिवृद्धि कर तर्फ ६ करोड ५६ लाख ७ हजार ६ सय र अन्तशुल्कमा १९ लाख ६ सय रुपैया गरी कुल १३ करोड ८६ लाख ७७ हजार रुपैया संकलन गर्ने लक्ष्य राखेकोमा ६६ लाख ६८ हजार मात्रै संकलन गरेको छ । आर्थिक वर्ष ०६६÷०६७ मा भन्सारले कुल लक्ष्यमध्ये ८३ प्रतिशत मात्रै राजश्व संकलन गरेको थियो । लामो समयदेखि यो नाकाबाट पैठारी भइरहेका केही महत्वपूर्ण वस्तु आउने क्रम घट्दा राजश्व प्रभावित भएको थियो ।