नेपालमा मोवाईल इन्टरनेट प्रयोगकर्ता साढे १३ लाख
मेचीनगर अनलाइन
|
Sunday, September 12, 2010
|
0 comments
काठमाडौ, भाद्र २७ - एक वर्षको अवधिमा इन्टरनेट प्रयोगकर्ताको संख्या करिब १ सय ६० प्रतिशतले बढेको छ । मोबाइलमा जीपीआरएस चलाउनेको संख्या बढेकाले इन्टरनेट प्रयोगकर्ता बढेको देखिएको हो । योसँगै नेपालमा इन्टरनेट घनत्व ४ दशमलव ८५ प्रतिशत पुगेको छ । नेपाल दूरसञ्चार प्राधिकरणले प्रकाशित गरेको तथ्याङ्कअनुसार गत आर्थिक वर्ष ०६५/६६ अन्तिम (असारसम्म) मुलुकमा इन्टरनेट सेवा प्रयोगकर्ताको संख्या ५ लाख १५ हजार ५ सय ९२ रहेको थियो । यो वर्ष ०६६/६७ मा बढेर १३ लाख ५९ हजार ८ सय ५ पुगेको छ ।प्राधिकरणका अनुसार अघिल्लो वर्षको तुलनामा गत वर्षको अन्तमा मोबाइलमा जीपीआरएस इन्टरनेट चलाउनेको संख्या झन्डै ८ लाखले बढेको छ । अघिल्लो साउनमा ३ लाख ६३ हजार ९ सय ४२ जनाले जीपीआरएस चलाउने गरेकोमा अहिले यो संख्या ११ लाख ५३ हजार ६ सय ४३ पुगेको छ । मुलुकको सबैभन्दा ठूलो दूरसञ्चार सेवा प्रदायक कम्पनी नेपाल टेलिकम र निजी क्षेत्रको पहिलो कम्पनी स्पाइस नेपाल (एनसेल) ले जीपीआरएस सेवा प्रदान गरिरहेका छन् । यसमा सबैभन्दा बढी हिस्सा एनसेलको छ ।
'अहिले एनसेलबाट जीपीआरएस इन्टरनेट चलाउनेको संख्या ९ लाख ८९ हजार २ सय ९० छ,' प्राधिकरणले भनेको छ, 'गत वर्ष एनसेलमा जीपीआरएस चलाउने ३ लाख ३२ हजार ४ सय २८ थिए ।' प्राधिकरणका प्रवक्ता कैलाशप्रदाय न्यौपाने मोबाइलको पहुँच बढेकाले जीपीआरएसका प्रयोगकर्ता उच्चदरमा बढेका बताउँछन् । 'मोबाइलको नेटवर्क, सर्वसाधारणको पहुँच र जीपीआरएस शुल्कमा आएको कमीले प्रयोग बढेको हो,' उनले भने, 'युवा वर्ग इन्टरनेट चलाउन उत्साहित हुन्छन् । उनीहरूको मोबाइलमा पहुँच भएकाले जीपीआरएसको प्रयोग बढेको हो ।'
एनसेलको भन्दा बढी मोबाइल प्रयोगकर्ता भए पनि नेपाल टेलिकमका ग्राहकले कम जीपीआरएस इन्टरनेट चलाएका छन् । प्राधिकरणका अनुसार अघिल्लो वर्ष टेलिकमको मोबाइलबाट ३१ हजार ५ सय १४ जनाले जीपीआरएस सेवा लिने गरेकामा यो बढेर १ लाख ६४ हजार ३ सय ५३ पुगेका छन ।
यस अवधिमा नेपाल टेलिकमले प्रदान गरिरहेको एडीएसएल इन्टरनेटको उपभोक्ताको पनि उल्लेख्य वृद्धि भएको छ । अघिल्लो वर्षको १५ हजार ६ सय ६१ एडीएसएल प्रयोगकर्ता रहेकोमा अहिले बढेर ४५ हजार ४ सय ३५ पुगे । यसमा उपभोक्ता आकषिर्तभए पनि टेलिकमले विस्तार र सेवा पर्याप्त रूपमा गर्न नसक्दा सोचेअनुसार उपभोक्ता बढेनन् ।
डायलअप, वायरलेस मोडेम, केवल मोडेम, अप्टिकल फाइवर, अर्थनेट र केवल इन्टरनेट प्रयोगकर्ताको संख्या भने घटेको छ । गत वर्ष यी सेवाको कुल प्रयोगकर्ता १ लाख १३ हजार ४ सय ६ रहेकोमा अहिले घटेर ७३ हजार १ सय ८६ मा झरेको छ । टेलिकमको डायलअप प्रयोगकर्ताको संख्यामा आएको उच्च गिरावटले यो घटेको हो ।
अघिल्लो वर्ष टेलिकमको डायलअप सेवा प्रयोग गर्ने ५१ हजार ९ सय ६ रहेकामा अहिले ८ हजार १ सय ८६ मात्र छन् । उनी डायलअप झन्झटिलो भएकाले प्रयोगकर्ताले यो प्रविधि छाडेको बताउँछन् ।
इन्टरनेट सेवा प्रदायक (आईएसपी) कम्पनीका ग्राहक सख्या वृद्धि भने एक वर्षको अवधिमा सुस्त रह्यो । अहिले ४२ वटा आईएसपीले इन्टरनेट सेवा दिइरहेका छन् । गत वर्ष यी कम्पनीको उपभोक्ता ६१ हजार ५ सय रहेकोमा अहिले ६५ हजार पुगेका छन् । युनाइटेड टेलिकमले सीडीएमए प्रविधिबाट दिएको इन्टरनेट सेवा प्रयोगकर्ता १९ हजार २ सय २० बाट बढेर २४ हजार ८ सय २३ पुगेका छन्
Source :- Kantipur Online
Filed Under: प्रबिधि
0 comments
Trackback URL | Comments RSS Feed