काँग्रेस महाधिवेशनको प्रचार तीब्र झापाबाट दर्जन उमेद्वार

महाधिवेशन प्रचारका लागि काँग्रेसको २ नम्वर क्षेत्रीय समितिले आज क्षेत्रस्तरीय मोटरसाइकल र्यालीको आयोजना गर्यो । जिल्ला सभापति उद्धव थापाले विर्तामोडमा उद्घाटन गरेको र्याली चारपाने,
विर्तावजार, गरामनी, हल्दिवारी, चन्द्रगढी, ज्यामिरगढीको परिक्रमा गरी चारआली चोकमा आएर सम्पन्न भएको थियो । काँग्रेस झापाका कार्यालय सचिव जय दाहालका अनुसार सवै क्षेत्रमा व्यानर टाँग्ने र पम्प्लेटिङ गर्ने काम भइरहेको छ । 

सामेली ढंगले पहिलो पटक हुन गइरहेको महाधिवेशनमा पुराना केन्द्रीय सदस्यमध्ये कृष्णप्रसाद सिटौलाले महामन्त्रीमा प्रतिष्पर्धा गर्ने बताइसक्नु भएको छ । उहाँ सभापतिका प्रत्यासी सुशील कोइरालाको टीमबाट महामन्त्रीमा नपरे केन्द्रीय सदस्यमा उठ्ने पक्कापक्की छ । अर्का केन्द्रीय सदस्य चक्र बाँस्तोला भीमबहादुर तामाङलाई सभापति र नरहरि आचार्यलाई महामन्त्रीको उमेद्वार बनाई आफू केन्द्रीय सदस्य बन्ने गरी चुनावमा होमिनु भएको छ ।

केन्द्रीय सदस्यद्वय सिटौला र बाँस्तोला बाहेक यस पटकको महाधिवेशनबाट केन्द्रीय सदस्य हुन झापालीहरु सुधिरकुमार शिवाकोटी, विश्वप्रकाश शर्मा, डिल्ली सिटौला, गोपाल बस्नेत, जीतबहादुर पुरी लविङमा सक्रिय देखिनुभएको काँग्रेस स्रोतले जनाएको छ । उहाँहरुको आकाँक्षा अञ्चलबाट केन्द्रीय सदस्य हुने छ । उहाँहरु बाहेक मेचीबाट हुने एक केन्द्रीय सदस्यका लागि बेनुप प्रसाईं, दीपकप्रकाश बाँस्कोटा र सुरेन्द्र तिम्सिना पनि चुनावी दौडमा हुनुहुन्छ । त्यस्तै, महिलाबाट ६   केन्द्रीय सदस्य हुने विधानमा व्यवस्था छ । त्यसका लागि झापाबाट सुशीला ढकाल र सरिता प्रसाईं लाइन मिलाउन लाग्नु भएको बताइएको छ । आदिवासी जनजातिको कोटा ५ जनामा २ जना महिलाको व्यवस्था भएकाले उषा गुरुङ महिलाबाट केन्द्रीय सदस्य उठ्ने स्रोतले जनाएको छ ।

काँग्रेसको आसन्न महाधिवेशनबाट सभापति, महामन्त्री र कोषाध्यक्ष बाहेक ६१ जना केन्द्रीय सदस्य निर्वाचित हुने छन् । जसमा खुल्लाबाट २५ जना, महिला ६, मधेशी पुरुष ३, महिला २, आदिवासी जनजाति पुरुष ३, महिला २, दलित पुरुष ३, महिला २ र मुस्लिम १ जना हुनेछन् । ६१ सदस्यका लागि ११ जना झापालीले आकाँक्षा देखाएका छन् । झापाबाट जम्मा ८६ जना महासमिति सदस्य र महाधिवेशन प्रतिनिधि छन् ।