आफ्नै प्रेमिकाको गोली हानी हत्या
मेचीनगर अनलाइन
|
Tuesday, September 28, 2010
|
0 comments
पाँचथर, ११ असोज,आफ्नै प्रेमिकालाई गोली हानी हत्या गरेर एक युवक फरार भएका छन् । उनीहरूबीच पाँच महिनादेखि प्रेम-सम्बन्ध थियो ।सिवा-७ की १९ वर्षीया सूक्ष्मा तुम्ब्रोकलाई उनका प्रेमी ताप्लेजुङ चाँगे-१ निवासी करिब २० वर्षीय पवन नामले चिनिने समुखहाङ् आङ्बोहाङले हत्या गरेका हुन् । फरार आङ्बुहाङको सशस्त्रसहितको प्रहरी टोलीले खोजी गरिरहेको जिल्ला प्रहरी कार्यालयका प्रहरी निरीक्षक शिव श्रेष्ठले बताए । बि्रटिस आर्मी तालिम सेन्टर धरानमा बस्दै आएका आङ्बुहाङ गल्ला छनोटमा फेल भएपछि फर्किने क्रममा आफ्नो प्रेमिकाको हत्या गरेर फरार भएका हुन् । उनले तुम्रोकलाई शुक्रबार भेट्न बोलाएर फिदिम तुम्रोक होटलमा तीन दिन सँगै राखेका थिए । छुट्ने समयमा हत्या गरेको होटलका प्रोप्राइटर विमला तुम्रोकले बताइन् ।
मृतककी बहिनी सुमित्रा तुम्रोकका अनुसार ५ महिनादेखि उनीहरूबीच प्रेम-सम्बन्ध रहँदै आएको थियो । गत जेठ ११ गते विराटनगरमा भएको सहकारीसम्बन्धी गोष्ठीमा सहभागी हुने क्रममा उनीहरूबीच चिनजान भएको थियो । उनले भनिन्, 'मलाई माया गर्ने मान्छेले भेट्न बोलाएको छ भन्दै निस्किएकी दिदीलाई उसैले सिध्याएछ, यो कस्तो माया ?'
मृतकको बायाँ छातीमा गोली लागेको छ । घटनास्थलबाट प्रहरीले मृतकको मोबाइल, ब्याग र फरार अभियुक्तको नागरिकतासहित थप कागजात तथा गोलीको खोका बरामत गरेको छ । गोलीको खोका पेस्तोलको हुन सक्ने प्रनि श्रेष्ठले बताए । जाहेरी प्रक्रिया ढिलाइले गर्दा मृतकको पोस्टमार्टम हुन सकेको छैन ।
Filed Under: अपराध
0 comments
Trackback URL | Comments RSS Feed