टेलिकम प्रयोगकर्ता १ करोड नजिक
मेचीनगर अनलाइन
|
Tuesday, September 7, 2010
|
0 comments
भाद्र २२ - प्रत्येक महिना प्रविधिलाई जीवनको अभिन्न अंग बनाउनेहरूको चासोसँगै मोबाइल, फोन र इन्टरनेट प्रयोगकर्ताको संख्या १ करोडको नजिक पुगेको छ ।
गतअसार मसान्तसम्म यस्ता प्रयोगकर्ताहरूको संख्या ८९ लाख ३० हजार पुगेको थियो । गत आर्थिक वर्षमा मात्र २६ लाख प्रयोगकर्ताहरू बढेका हुन् । यस आधारमा साउनदेखि असोजसम्मको तीन महिनाभित्र १० लाख प्रयोगकर्ता बढ्नु आश्चर्यको विषय नभएको सम्बद्ध विज्ञहरू बताउँछन् ।
सरकारी स्वामित्वको नेपाल टेलिकमले साउनभित्र आफ्नो ग्राहक संख्या ४० लाख नाघेको घोषणा गरिसकेको छ । यही अवधिमा दु्रत गतिमा सेवा विस्तार गरिरहेकेा निजी क्षेत्रको स्पाइस नेपालले ग्राहक ३० लाख नाघेको जनाएको थियो । यस्तै अर्को कम्पनी युटियलका ग्राहक ५ लाख पुगेका छन् । पछिल्लो वृद्धिदरका आधारमा छिट्टै यसका प्रयोगकर्ता १ करोड नाघ्ने देखिएको नेपाल दूर सञ्चार प्राधिकरणका प्रवक्ता कैलाश न्यौपाने बताउँछन् । 'प्रतिस्पर्धाले सस्तो मूल्यमा सजिलोसँग सेवा पाइन थालेपछि ग्राहक संख्या दु्रत गतिमा बढेको देखिन्छ,' उनले भने । अन्य वस्तु र सेवाको मूल्य बढिरहेका बेला दूरसञ्चार सेवा भने सस्तिएको छ ।
टेलिकम सेवामा जिएसएम मोबाइलको हिस्सा यसमा सबैभन्दा धेरै छ । ८९ लाख ३० हजारमध्ये यसका प्रयोगकर्ता ६९ लाख पुगेका छन् । यसको १६ प्रतिशतभन्दा धेरैले जिपिआरएस इन्टरनेट सेवा लिइरहेका छन् ।
'मासिक ३ लाख ग्राहक थपिएमा टेलिकम प्रयोगकर्ताको संख्या असोजभित्र १ करोड पुग्नेछ,' नेपाल टेलिकमका एक अधिकारी भन्छन्, 'गत असारमा मात्र साढे ४ लाख ग्राहक थपिएका थिए, त्यसैले चाडवाडको मौसममा अझ थपिनु ठूलो कुरा होइन ।' यस्तो पर्वमा प्राप्त हुने थप आम्दानीबाट मोबाइललगायत सामान किन्न सक्ने उनको अनुमान छ । नयाँ सेवासँगै विस्तार अझ हुने अनुमान छ । हालै मात्र केही कम्पनीले मोबाइल बैंकिङलगायत सेवा सुरु गर्ने घोषणा गरिसकेका छन् ।
'पाँच वर्षअघिसम्म मोबाइल लिनु भनेको महँगो थियो, सेवा पनि सीमित थिए,' सर्वसाधारण प्रयोगकर्ता सुशील गौतम भन्छन्, 'अहिले इमेल, इन्टरनेटलगायत सुविधासहित यो जीवनकै अभिन्न अंग भइसक्यो । गत असारमसान्तसम्म नेपाल टेलिकमले ल्यान्ड लाइन, सिडिएमए र थि्रजीसमेतका ग्राहक संख्या ५४ लाख ६० हजार पुगेको जनाएको थियो । स्पाइस नेपालका २९ लाख ४० हजार, युटिएलका ४ लाख ६० हजार, एसटिएम टेलिकमका ४ हजार ८ सय, नेपाल सेटेलाइट टेलिकमका ५४ हजार ७ सय ३९ ग्राहक थिए ।
'टेलिकम अब विलासी नभएर आवश्यकता भइसक्यो र मूल्य पनि धेरैको पहुँचभित्र आइसकेको छ,' स्पाइस नेपालकी कर्पोरेट कम्युनिकेसन अधिकृत सञ्जु कोइराला भन्छिन्, 'टेलिफोनको एउटा लाइन लिन वर्षौं कुर्नुपर्ने समय अब सकिएको छ ।'
'हामीले हिजो मात्र सेवा सुरु गरेजस्तो लाग्छ' युटिएलका महाप्रबन्धक मदन सिंह भन्छन्, 'तर सेवामाथिको सहज पहुँच र प्रतिस्पर्धाका कारण ठूलो संख्यामा यो विस्तार भएको छ ।' यही महिना थप १० जिल्लामा सेवा विस्तार गर्ने योजना रहेको पनि उनले बताए ।
इन्टरनेट र जिपिआरएसजस्ता सेवाको उपलब्धता, सर्वसाधारणको बढदो क्रयशक्ति, मोबाइल सेटको घट्दो मूल्यले सर्वसाधारणसम्म मोबाइलको पहुँच बढाएको छ । अन्तर्राष्ट्रियस्तरमा टेलिकमका उपकरणको घट्दो मूल्य, प्रतिस्पर्धा, पि्रपेड सेवाको सुरुवात टेलिफोन विस्तारका मुख्य कारण हुन् ।
नेपाल टेलिकमले २०५८ देखि मोबाइल सेवा सुरु गरेको थियो । त्यतिबेला टेलिफोन भएका व्यक्तिहरू कुल जनसंख्याको १ दशमलव ४ प्रतिशत थिए । हाल गत वर्षको अन्त्यमै देशका सबै गाउँ विकास समितिमा टेलिफोन पुगेको छ ।
पछिल्लो ५ वर्षमा टेलिफोन सेवा उपयोग गर्नेहरूको संख्या उल्लेख्य बढेको छ । निजी क्षेत्रको प्रवेशले यसको विस्तार बढाएको छ ।
युनाइटेड टेलिकमले २०६० बाट सेवा सुरु गरेको हो । निजी क्षेत्रको पहिलो जिएसएम सेवा प्रदायक कम्पनी स्पाइसले २०६१ देखि सेवा दिन थालेको हो ।
Filed Under: प्रबिधि
0 comments
Trackback URL | Comments RSS Feed