बसपार्कका लागि ९ करोड

विगतमा निकै सुस्ताएको मेचीनगरको विकासे गतिविधि एकाएक तीब्र हुन थालेको छ। दातृ संस्थाहरुबाट धमाधम लगानी भित्रिएपछि यहाँ विकासे निर्माणको लहर नै चल्न थालेको हो ।

विश्व बैंकले ४२ करोड सहयोग दिने निश्चित भए लगत्तै काँकरभिट्टा र इट्टाभट्टामा यातायातसँग सम्बन्धित दुई ठूला लगानीको विकासे परियोजनाको कार्यन्वयन शुरु भएको छ । नेपाल सरकारको ‘शहरी विकास कोष’ र स्थानीय स्रोत परिचालन गरेर मेचीनगर नगरपालिकाले काँकरभिट्टामा सुविधा सम्पन्न बस टर्मिनल र इटाभट्टाको प्यारिभिट्टामा बसपार्क निर्माण गर्ने भएको हो । 

बसपार्क र बस टर्मिनल निर्माणका लागि ८ करोड ८७ लाख ३५ हजार ५ सय रुपैयाको लगानी हुने नगरपालिकाका कार्यकारी अधिकृत टिकादत्त राइले जानकारी दिए । 

नगपालिकाले दुवै निर्माणका लागि ठेक्का प्रक्रिया अघि बढाएको छ । निकट भविष्यमा ठेकेदारको टुंगो लगाई काम अघि बढाउने नगरपालिकाको योजना छ । काँकरभिट्टाको बस टर्मिनलका लागि नगरपालिकाले ३ करोड २२ लाख ५६ हजार ४ सय २९ रुपैँया र प्यारिभिट्टाको बसपार्कका लागि ५ करोड ६४ लाख ८१ हजार ७ सय ६२ रुपैंया बजेट छुट्याएको नगरपालिकाका इञ्जिनियर कमल कोइराला बताउँछन् । इञ्जिनियर कोइरालका अनुसार हालको काँकरभिट्टा बसपार्कको साढे १२ कठ्ठामा टर्मिनलका लागि १५ लाखको वाल, २१ लाखको ड्रेन, ३२ लाखको फुटपाथ, १ करोड २० लाखको कालोपत्रे, १३ लाखको विद्युतीय उपकरण र ५१ लाखको शो–शप निर्माण गरिने छ ।

ठेकदारसँग सम्झौता भएको १८ महिनाभित्र निर्माण कार्य सम्पन्न गर्ने र अर्को चरणको निर्माणका लागि नयँ योजनामा लगानी गर्ने नगरपालिकाले जनाएको छ । 

निर्माण सकिएपछि बस, माईक्रो तथा ट्याक्सिहरुलाई प्यारीभिट्टामा पार्किङ गराइनेछ भने काँकरभिट्टा टर्मिनलबाट यात्रु ओराल्ने र चढाउने मात्र गरिने छ । 

हालको बसपार्क क्षेत्रमा टर्मिनलको नयाँ संरचना बनाउँदा मेची बस व्यावसायी संघ र महेन्द्र राजमार्ग यातायात कर्मचारी कल्याण कोषको लामो भवन सुरक्षित राखिने भएको छ । 

स्रोतका अनुसार बसपार्कको पश्चिमपट्टि टेम्पो र माईक्रोका लागि स्टेण्ड बनाइने छ भने दक्षिणपट्टि कार, जीप, भ्यान पार्किङस्थल निर्माण गरिनेछ । लामो र छोटो दुरिका गाडीको छुट्ने रुट र टिकट काउन्टर अलग अलग राखिने छ । 

पश्चिमपट्टि क्यान्टिन, ट्वाइलेट आदिका ब्लक रहेनछन् । उत्तर–पश्चिम लाइनमा ७५ मिटरसम्मका घरटहरा जोगाइने तर पूर्वी उत्तरी लाइनका ८० मिटरसम्मका कुनै पनि अतिक्रमित सरचना भत्काएर शो–शप निर्माण गरिने भएको छ । 

समाचार स्रोत :– झापाको पूर्वीद्वाराबाट प्रकाशित हुने जनसंसद दैनिक