विश्व वैंकद्वारा मेचीनगरलाई ४२ करोड

झापाको कान्छो नगरपालिका मेचीनगरको दीगो विकास र सहरी व्यवस्थापनका लागि विश्व बैंकले लगभग ४२ करोड रुपैयाँ लगानी गर्ने भएको छ । 

नगरको पूर्वाधार विकास, मर्मत सुधार, सहरी सुविधा वृद्धि र पर्यटकीय आर्कषणका निम्ति विश्व बैंकले ठूलो मात्रामा लगानी गर्ने भएपछि हाल योजना छनौटको प्रक्रिया चलिरहेको मेचीनगर नगरपालिकाका कार्यकारी अधिकृत टिकादत्त राईले जानकारी दिए । 

धुलाबारी र काँकरभिट्टा गाउँ विकास समितिलाई जोडेर २०५२ सालमा छुट्टै नगरपालिका बनेपछि विदेशी दातृ निकायले ठूलो मात्रामा सहयोग प्रदान गर्न लागेको यो पहिलो अवसर हो । नगर अधिकृत राईले मेचीनगरलाई ५८ लाख अमेरिकी डलर अर्थात लगभग ४२ करोड रुपैयाँ सहयोग प्रदान गर्ने निश्चित छ भैसकेको बताए । 

विश्व वैंकले नेपाललाई सुन्दर, पूर्वाधारयुक्त र सुविधासम्पन्न सहरको रुपमा विकसित गर्न के कस्ता योजना ल्याउनु पर्छ भनी नगरपालिका र स्थानीयवासीसँग सुझाव माग्दै विभिन्न चरणमा छलफल गरिसकेको छ । स्थानिय राजनीतिक दल, सामाजिक संघ संस्था र सरोकारवाला विभिन्न निकायले विश्व बैंकलाई विकास योजनाको संभाव्यताबारे जानकारी गराइसकेका छन् भने राम्रा योजनाको छनौटमा नगरपालिकाले सक्रियता निकै बढाएको पाइएको छ । यसै सुझाव पेश गर्ने क्रममा मेचीनगर अनलाईनको सहयोगमाMechinagar Vision 2030 पेश गरिएको थियो। यो भिजन विस्तृत जान्न यहाँ क्लिक गर्नुहोला ।

उक्त योजनालाई मेचीनगरको काँकरभिट्टा, इटाभट्टा र धुलाबारी गरेर तीन क्षेत्रमा विकेन्द्रित गरिने भएको छ । काँकरभिट्टाको पूर्वी प्रवेशद्वारलाई आकर्षक र राष्ट्रिय पहिचानयुक्त बनाउन मेची पुलदेखि प्यारीभिट्टासम्म लोकमार्गलाई ६ लेनको फराकिलो बनाउने, सडक बत्तीको पर्याप्त व्यवस्था गर्ने र सडक पेटी हरियाली युक्त बनाउने योजना प्रस्तावित गरिएको बताइन्छ । त्यसैगरी, इटाभट्टा क्षेत्रमा जग्गा विकास गरी आधुनिक सुविधायुक्त नयाँ सहर बसाउने र उत्तर–दक्षिण सडकलाई ४ लेनको बनाउने योजना प्रस्ताव गरिएको छ । 

धुलाबारीको पनि उत्तर–दक्षिण सडकलाई स्तरवृद्धि गर्ने, मागुमाडी र थोप्लेविरान सामुदायिक वनलाई पर्यटकीय आकर्षणको केन्द्र बनाउने, मनोरञ्जन पार्क र चिडिया घर बनाउने र आयआर्जनका निम्ति कृषि मण्डी बनाउने प्रस्ताव गरिएको छ । 

विश्व बैंकले प्रस्तावहरुको अध्ययन र संभाव्यता हेरेर योजनाको अन्तिम छनौट गरेपछि योजना कार्यान्वयन शुरु गरिने भएको छ। यही जनवरीदेखि योजना कार्यान्वयन थालिने सक्ने अधिकृत राईले बताए ।