धुलाबारीमा कृषि मण्डी बनाउने तयारी

धुलाबारी २२÷ मंसिर अर्थमन्त्री सुरेन्द्र पाण्डेले मेचीनगरमा कृषि मण्डी स्थापनाका लागि सहयोगको आश्वासन दिएपछि त्यसका लागि उपयुक्त जग्गाको खोजी सुरु गरिएको छ । 

मेची उद्योग वाणिज्य संघले मेचीनगर क्षेत्रमा आधुनिक सुविधासम्पन्न कृषि मण्डी स्थापनाका लागि पहल गरेको हो । हालै काँकरभिट्टा आएका बेला अर्थमन्त्री पाण्डेले ‘जग्गा खोजे भौतिक पूर्वाधार निर्माणमा बजेट दिने’ बताएपछि अहिले जग्गाको खोजि थालिएको छ । 

मण्डीमा कृषिजन्य उत्पादनको संकलन, भण्डारण र प्रशोधनका साथै अक्सन विक्री स्टल रहने छ । कुचो, अदुवा, अलैंची, सुपारी, सागसव्जी र फलफूलजस्ता बस्तुहरु त्यहाँबाट भारत र बंगलादेश समेत निर्यात गर्न सकिने छ । संघकै पहलमा आइतबार आयोजित एक भेलाले मेचीनगर नगरपालिकाका कार्यकारी अधिकृत टिकादत्त राईको संयोजकत्वमा जग्गा खोजीका लागि सम्भाव्यता अध्ययन समिति गठन गरेको छ । 

समितिका सदस्यहरुमा मेची उवासंघका अध्यक्ष केशवराज पाण्डे, लक्ष्मी उप्रेती, रविन बस्नेत, वीरबहादुर श्रेष्ठ, गणेशविक्रम नेम्वाङ र हरि प्रसाई रहेका छन् । 

समितिले केही दिनमा उपयुक्त जग्गाको पहिचान गरी कृषि मण्डीको सम्भाव्यता प्रतिवेदन तयार पार्ने समतिका संयोजक राईले बताए । 

मण्डीका लागि ५ देखि १० विघाहा क्षेत्रफलको एउटै जग्गा खोजिने भएको छ । जग्गा राजमार्गसँग जोडिएको या नजिक खोजिने बताइएको छ । जग्गाको व्यवस्था गरेपछि संघ, नगरपालिका र राजनैतिक दलको संयुक्त प्रतिनिधिमण्डल काठमाडौं जाने भएको छ । 

व्यवसायीका तर्फबाट धुलाबारीमा कृषि विकास बैंकले नेपाल चिया विकास निगमबाट लिलामीमा लिएको ६ विघाहा जग्गालाई कृषि मण्डी बनाउनुपर्ने प्रस्ताव आएको छ । धुलाबारी चोकमै रहेको कारण यातायात र अन्य सुविधाका दृष्टिले निगमले जग्गालाई उपयुक्त ठहर्याएको मेची उद्योग वाणिज्य संघका अध्यक्ष केशवराज पाण्डे बताउँछन् । 

हाल नगरपालिकाकै स्वामित्वमा रहेको मेचीनगर–२ स्थित लालपानीस्थित ल्याण्डफिल्ड साइडको जग्गालाईपनि कृषि मण्डीका लागि सम्भाव्य स्थान मानिएको छ । स्थानीय विरोधले सेनेटरी ल्याण्डफिल्ड साइट बन्न नसकेको सो जग्गा बर्षौदेखि खाली छ । नगरपालिकाकै स्वामित्वमा भएकाले मण्डी बनाउन सजिलो हुने भए पनि राजमार्गबाट केही टाढा हुादा यातायात र सुरक्षाको चुनौती झेल्नुपर्ने व्यवसायीहरु बताउँछन् । 

तेस्रो विकल्पका रुपमा धुलाबारी नजिक राजमार्गबाट सात सय मिटरको दुरीमा ६ विघाहा जग्गाको प्लटै खरिद गर्न सकिने स्थानीय एक व्यापारिले आकर्षक प्रस्ताव गरेका छन् । उनका अनुसार ४ विगा जग्गा खरिद गर्ने भए दाताले मण्डी निर्माणका लागि २ विघा निशुल्क दान गर्ने भएका छन् ।